[後記] 高考放榜後，因成績不理想，在JUPAS最後修改時決定要剔走所有HKUST的科目(高考後到過HKUST參觀，很喜歡那裡的環境)。不過最終那年都入不到U，估計是因為只選了所有收分最低的科目，而沒管學科本身與我的高考科目有多相關，自然唔夠人鬥。
要親手放棄自己一直渴望嘅嘢，原來係咁痛苦…
自問由細到大，真正渴望得到嘅嘢唔多；因為我係個冇乜所謂嘅人－－你問我食咖喱飯定日本菜，我會話冇乜所謂；你問我去BBQ定踩單車，我都會話冇乜所謂。因為對我嚟講，好多嘢都真係冇所謂… 選擇邊樣我都鍾意。
但係今次，真係未試過會對一樣嘢咁渴望。但係，因為自己一手做成，搞到自己唔放棄，都唔得…
其實都過咗幾日㗎喇！我都嘗試唔諗咁多，打算滿足於目前嘅抉擇。但係，一行出街，睇到咁好嘅天氣、咁靚嘅夏日；反而令我覺得好痛苦，令我覺得失去咗少少生存嘅意義－－點解一件本來喺能力範圍內嘅事，要搞到而家一定要親手放棄。只係差少少，但就係差少少，一定要放棄…
坦白講，喺屋企嗰陣都OK；但係真係一行出街，就覺得世界褪咗色。喺大家都開心嘅炎炎夏日中，我會覺得後悔，後悔自己冇曾經努力去捉緊－－因為當初對呢件事冇任何渴望，亦認為唔需要「捉」都已經「緊」。
雖然我仍然大踏步、抬高頭向前行，但我知道係有遺憾，起碼知道責任全都在於自己。亦坦白講，其實我唔需要做到放棄，我可以博一博。但係我知道今鋪太大，玩唔起。我唔可以好似其他人咁瀟灑去博一鋪，我有我嘅顧慮。
所以，我同自己講唔可以後悔，就算事後證明博得過。但如果真係博得過的話，我一定會後悔、好後悔，後悔自己點解當初咁冇膽，唔博就放棄。另一方面，我又唔想個結果係博唔過，因為咁代表我而家嘅選擇都有好大風險。我唔想再徬徨。
咁當然，我好希望目前嘅選擇係正確，可以如願。對於自己親手放棄咗嘅嘢，我只可以話同佢無緣喇！
我只可以安慰自己「塞翁失馬，焉知非福」。或者我一直渴望嘅冇自己想像中咁好，又或者目前嘅選擇個turn out都會好好。Who knows?
目前唯一可做嘅，又真係只有等待囉！可能幾年之後，我會對選擇咗D乜完全唔介懷；但係我唔會忘記我呢一刻嘅心情－－我知道咗凡事都要目光長遠D，唔可以一直諗住「船到橋頭自然直」。我都會有自己介懷、有所謂嘅事。
