Days of Immaturity

好耐無見黎仔，尋晚發夢見到佢。
佢比現實中肥左，我第一眼見到佢就即刻同佢say sorry，話我辜負左佢既一番心血。
同佢一路行，一路講緊前途問題；又同佢講點解我選擇重考都唔去讀副學士。

估唔到我既罪疚感係咁重。
我亦係個自私既人，對於佢前排中風，我竟然晌夢入面完全忘記左，提都無提下。
無見咁耐，我晌夢入面都係只係同佢講下我高考既事，講下黎緊呢一年我打算點做。講兩講就醒左。

坦白講，其實真係無面目番學校搵佢。
雖然佢教Applied Maths唔係真係咁掂，我地好多時都追唔到佢講乜；但以阿sir黎講，黎仔已經算係非常認真，而且亦都好好人；記得佢上年暑假搵我地補課，一星期補三日，佢就提住我地就快考試，而我地就只係掛住去玩；而除左課程之外，佢亦都教曉左我地好多做人態度。
就晌我臨考Applied Maths既時候，聽到佢中左風既消息。當時覺得好混亂，但點都要考好個試。考完之後過左幾日，我就將呢件事丟淡左，開心咁去日玩夜玩lu。
總係覺得無論考成點，都好應該番學校搵一搵佢。但點都估唔到，我竟然要考多一次；佢既中風已經好番，但係我就覺得無面目再番學校喇。

晌夢入面同佢傾既內容，其實全部都係一D我日諗夜諗既煩惱。
雖然並唔係真係同佢傾訴左，但我都覺得舒服番好多。望番我晌學期尾同黎仔影果張相，我就知道我真係需要努力。
唔好話係咪辜負佢既教導喇。起碼都畀番個交代畀自己丫！

今個中秋仍然悶熱。
唔知係咪實行左屋村扣分制，望出街都唔見通處火光喇。
我都幾年無落街燒蠟燭喇，（都成廿歲人囉！）中秋節既氣氛一年年下降。
不過，相信呢個並唔單止係我個人既轉變。感覺上，好多小朋友都對落街點蠟燭無咁熱衷。可能大家都搵到一Ｄ更好玩既野去過中秋喇卦。

不過都岩既。唔同年代，生活方式係有轉變。
以前，未到中秋節，大家都已經人人一個塑膠燈籠，（我仲記得當時我有個幪面超人燈籠同我差唔多高）而且仲買定十盒左右既蠟燭。
我仲記得果時番下晝班，就算第日要番學，當晚都可以玩到一點先走。

講到煲蠟，咁我當然無煲過啦。
唔係扮乖，因為煲蠟都唔係乜壞事。只係一向份人保守，玩野細細地就夠，從來唔敢玩大鑊野。
（如果煲蠟煲得大，真係大鑊架。燒親自已燒親人都唔好啦！好傷架。）
以前我中秋會興玩一Ｄ殘忍野，就係燒蝸牛。
通常Ｄ人會中意燒蟻，但我覺得太殘忍喇。一隻蟻好地地又細隻。但可能因為我好驚同好憎蝸牛，所以果時燒得幾過癮。
除此之外就燒下紙盒，燒下西柚皮。（哈哈，不過係燒唔著既。）

再講下月餅，相信大家都中意食月餅；近來仲有好多新口味。但係我就真係從來都唔食月餅。
其實無話乜怕肥唔健康既，只係我一向都唔中意食中式肥膩糕點。（所以乜野年糕，蘿蔔糕我通通唔食架，甚至連糉都唔食。哈哈。）
所以Ｄ人成日同我講乜冰皮呀，白蓮蓉呀。我通通都唔係好明口感，味道有乜分別…

今個中秋節，我只係晌屋企過。但係就好輕鬆，呢兩日我將所有壓力拋開，呢一年要面對既壓力都唔理住。
或者我係逃避卦。趁住節日氣氛而逃避生活。
不過算啦。半年時間係短，但唔易過架。要跑長跑，唔可以一直開行turbo既。

開學已一個星期，相信大家的生活也開始穩定下來了。
上星期的雙風眼風球杜鵑，以火速為香港帶來了維持不夠半日的八號再九號；雖然不能為大家帶來任何假期，卻為一開學就帶來了放假氣氛。

我開始溫書，感覺好像很time consuming－－怎麼現在要讀一天的內容，以前可以在一個鐘內完成的呢？
原來以前根本不是讀書，物理的公式沒時間去作什麼理解，只能抄下所有的公式再背；純數也只是在計Calculus，其他的部份只是計了幾題。
沒辦法呀！考mock前才真正開始讀書（而不是溫書），不夠時間是理所當然的；考得差而令自己慢人一年是理所當然的，也是抵死的。

看來我也始終是個不能吃苦的人。雖然今個星期是失敗後的重新開始，我仍未令自己進入緊張狀態。
我就是不能做到很緊張，有如打仗的心情。不過，今次真的有了目標－－我真的很希望能入到科大。

坦白說，我現在並沒不是真的那麼灰；但就有種封閉了自己的感覺。
在此要宣讀一下我的道歉名單：

• 首先係阿淫虫。你今日就要去英國喇！但係我就無同你講過任何野，無搵你出黎食飯唱Ｋ，無打過電話畀你，甚至連祝福都無一句；就好似乜都唔知道咁。其實只係因為我而家一D mood都無，我係無初初放榜果陣咁灰，但仍然唔想出黎玩，甚至連出黎meet下都提唔起勁。
• 然後就係一班朋友同網友喇。排名不分先後：阿思，白魂，clement，Fibber，so man，Jeff，肥冼，helen以及其他網友。你地既留言我好似睇唔到咁無回覆，呢排亦都無晌你地Ｄ網站同留言版蒲頭；你地鼓勵我，但我就好似睇唔到，無理會咁。其實只係我目前晌水底，唔想浮番上黎住；我唔知講乜好，但目前真係想自閉一下。

正如之前所講，其實我並唔係好緊張好忙，亦唔係咁灰；但就係諗唔到同你地講乜，所以先要隱身，乜都扮唔知。

最後，講下改版。
其實我都將網頁zip起左，諗住唔再理佢。不過每次一黎到見到Summer Smiles時，就令我諗起呢個暑假，由玩到癲到知道要重新再讀一年。更何況，夏天已經過去，我都唔想再保持笑容。
另外，其他部份唔再浪費時間再改，我只係用左一個星期日黎改版，今日再做埋呢份一週報告。所以我關閉左其他部份，只係留番blog畀我自己，同埋GBook畀大家留句說話鬧下我都好。
附帶一提，右面果位哥仔係country music新人Jimmy Wayne，圖片取自佢既新MV《I Love You This Much》，版權當然屬於DreamWorks Nashville。
佢呢個眼神好符合我「灰」呢一個主題，而其實Jimmy Wayne既童年遭遇都好慘好慘，佢既歌對於生活唔如意既人都有好大既安慰。

最最後同大家講，我好多謝你地既鼓勵，我並唔係ignore你地。等我自閉一排啦，我好快會無事架喇。

九月一日，大家也開學了。
作為自修生的我，今天將要開始踏出難行的第一步。
難之一，高考難到出名唔使講，有人話高考Pure Maths就有如某Ｄ國家既大學二年級程度。
難之二，要自己一個人讀書溫書，的確寂寞，希望自己可以控制到自己。
難之三，半年時間其實不算多，要如何好好分配時間全由我自己話事，非常之難。
難之四，今年考試時間表出得差，物理同應用數竟然連續兩日考；上次是隔了廿多天。
難之五，是面對著無比壓力。坦白講，高考唯一用途係入大學；只要入得到你想入的科目，其實你考成點根本不值一提。

放榜過了幾個星期，父母的態度由支持變為睇死和冷嘲熱諷。
食飯時候，一句句車埋黎－－

而家Ｄ香港學生，中意先甜後苦。
而家Ｄ香港學生，一Ｄ自制力都無；又唔識分配時間，乜都做唔到。
個個都入到大學，但係你就掛住玩，貪舒服。而家幾失敗，頭都抬唔起，一Ｄ自信都無晒。

我唯有快快手爬埋啖飯，即刻衝番入房算喇。

而家我變成左我阿媽既仇人，我坐歪Ｄ又唔岩，笑大聲Ｄ又幼稚，講野細聲Ｄ又即係無自信，好樣衰。
咁大個仔，終於知道乜野叫「失寵」。兩個月前放高考成績，我考得差都無所謂；但入唔到大學？即係當你係殘廢。每日奚落你一鑊，每日總有抽秤既題材。
其實呢個亦係一般人既目光。外人睇我地，考成點唔重要，最重要入到名大學。對我地黎講，入到理想科目既唯一路徑就係成績。香港教育制度玩死人，但你係焗住要跟佢遊戲規則，吹唔吹脹！
入到唔理想既科目？唔緊要！最緊要係入到大學。見到有Ｄ成績比自己差既同學都入到中大理大，我知道今次輸既除左係成績，仲輸埋JUPAS既遊戲規則，中左爆水泡效應；唔浸死你都打殘你。
以前我可以好有志氣咁同自己講：如果要我入呢科我寧願repeat。
但今日我只知道一樣野－－死都要死入大學。就算入城大浸大都好，總好過乜都入唔到。而家丟人現眼。

晌父母眼中，每分每秒都要溫書。睇電視係錯，唔對住本書係錯。咁當然，而家用電腦就好似偷渡咁－－唔見得光！