Days of Immaturity

開學已一個星期，相信大家的生活也開始穩定下來了。
上星期的雙風眼風球杜鵑，以火速為香港帶來了維持不夠半日的八號再九號；雖然不能為大家帶來任何假期，卻為一開學就帶來了放假氣氛。

我開始溫書，感覺好像很time consuming－－怎麼現在要讀一天的內容，以前可以在一個鐘內完成的呢？
原來以前根本不是讀書，物理的公式沒時間去作什麼理解，只能抄下所有的公式再背；純數也只是在計Calculus，其他的部份只是計了幾題。
沒辦法呀！考mock前才真正開始讀書（而不是溫書），不夠時間是理所當然的；考得差而令自己慢人一年是理所當然的，也是抵死的。

看來我也始終是個不能吃苦的人。雖然今個星期是失敗後的重新開始，我仍未令自己進入緊張狀態。
我就是不能做到很緊張，有如打仗的心情。不過，今次真的有了目標－－我真的很希望能入到科大。

坦白說，我現在並沒不是真的那麼灰；但就有種封閉了自己的感覺。
在此要宣讀一下我的道歉名單：

• 首先係阿淫虫。你今日就要去英國喇！但係我就無同你講過任何野，無搵你出黎食飯唱Ｋ，無打過電話畀你，甚至連祝福都無一句；就好似乜都唔知道咁。其實只係因為我而家一D mood都無，我係無初初放榜果陣咁灰，但仍然唔想出黎玩，甚至連出黎meet下都提唔起勁。
• 然後就係一班朋友同網友喇。排名不分先後：阿思，白魂，clement，Fibber，so man，Jeff，肥冼，helen以及其他網友。你地既留言我好似睇唔到咁無回覆，呢排亦都無晌你地Ｄ網站同留言版蒲頭；你地鼓勵我，但我就好似睇唔到，無理會咁。其實只係我目前晌水底，唔想浮番上黎住；我唔知講乜好，但目前真係想自閉一下。

正如之前所講，其實我並唔係好緊張好忙，亦唔係咁灰；但就係諗唔到同你地講乜，所以先要隱身，乜都扮唔知。

最後，講下改版。
其實我都將網頁zip起左，諗住唔再理佢。不過每次一黎到見到Summer Smiles時，就令我諗起呢個暑假，由玩到癲到知道要重新再讀一年。更何況，夏天已經過去，我都唔想再保持笑容。
另外，其他部份唔再浪費時間再改，我只係用左一個星期日黎改版，今日再做埋呢份一週報告。所以我關閉左其他部份，只係留番blog畀我自己，同埋GBook畀大家留句說話鬧下我都好。
附帶一提，右面果位哥仔係country music新人Jimmy Wayne，圖片取自佢既新MV《I Love You This Much》，版權當然屬於DreamWorks Nashville。
佢呢個眼神好符合我「灰」呢一個主題，而其實Jimmy Wayne既童年遭遇都好慘好慘，佢既歌對於生活唔如意既人都有好大既安慰。

最最後同大家講，我好多謝你地既鼓勵，我並唔係ignore你地。等我自閉一排啦，我好快會無事架喇。

九月一日，大家也開學了。
作為自修生的我，今天將要開始踏出難行的第一步。
難之一，高考難到出名唔使講，有人話高考Pure Maths就有如某Ｄ國家既大學二年級程度。
難之二，要自己一個人讀書溫書，的確寂寞，希望自己可以控制到自己。
難之三，半年時間其實不算多，要如何好好分配時間全由我自己話事，非常之難。
難之四，今年考試時間表出得差，物理同應用數竟然連續兩日考；上次是隔了廿多天。
難之五，是面對著無比壓力。坦白講，高考唯一用途係入大學；只要入得到你想入的科目，其實你考成點根本不值一提。

放榜過了幾個星期，父母的態度由支持變為睇死和冷嘲熱諷。
食飯時候，一句句車埋黎－－

而家Ｄ香港學生，中意先甜後苦。
而家Ｄ香港學生，一Ｄ自制力都無；又唔識分配時間，乜都做唔到。
個個都入到大學，但係你就掛住玩，貪舒服。而家幾失敗，頭都抬唔起，一Ｄ自信都無晒。

我唯有快快手爬埋啖飯，即刻衝番入房算喇。

而家我變成左我阿媽既仇人，我坐歪Ｄ又唔岩，笑大聲Ｄ又幼稚，講野細聲Ｄ又即係無自信，好樣衰。
咁大個仔，終於知道乜野叫「失寵」。兩個月前放高考成績，我考得差都無所謂；但入唔到大學？即係當你係殘廢。每日奚落你一鑊，每日總有抽秤既題材。
其實呢個亦係一般人既目光。外人睇我地，考成點唔重要，最重要入到名大學。對我地黎講，入到理想科目既唯一路徑就係成績。香港教育制度玩死人，但你係焗住要跟佢遊戲規則，吹唔吹脹！
入到唔理想既科目？唔緊要！最緊要係入到大學。見到有Ｄ成績比自己差既同學都入到中大理大，我知道今次輸既除左係成績，仲輸埋JUPAS既遊戲規則，中左爆水泡效應；唔浸死你都打殘你。
以前我可以好有志氣咁同自己講：如果要我入呢科我寧願repeat。
但今日我只知道一樣野－－死都要死入大學。就算入城大浸大都好，總好過乜都入唔到。而家丟人現眼。

晌父母眼中，每分每秒都要溫書。睇電視係錯，唔對住本書係錯。咁當然，而家用電腦就好似偷渡咁－－唔見得光！

放榜過了兩個星期, 終於接受了現實.
我今年無任何OFFER, 入唔到U. 本來打算報讀副學士課程, 但總覺得經NON-JUPAS上大學是比較困難和機會渺茫.
經過多番考慮, 終於也決定重讀重考. 由於不想讀夜校, 目前只決定自修.

坦言, 今次是人生的第一個挫折, 真正的挫折. 今次真係跌得好痛, 我真係好想大聲講句 “好慘!”. 不過又如何, 惡果由自己種下, 如今自己親手承受罷了; 最痛苦的莫過於令自己的父母失望, 為自己擔心. 又想起九月即將來臨, 我要開始每天到自修室溫書的生活了.
感覺很是難受呀! 一想起自己竟然沒有學校又沒有工作, 那種真正雙失的感覺真是很沉重. 以前看電視聽到雙失, 只會覺得是用來形容一些染了金髮的古惑仔, 或是一些不愛讀書不愛回家的反叛青年…
以前上學的時候很渴望放假. 現在對我來說是一年三百六十五日也是假期了, 我卻發現一個人真的不能如此生活; 這一年, 相信我也會活在雙失的陰影下, 還有要再次面對大考的壓力.

最幸運的是, 我還未失去父母的心. 縱使他們是極度失望, 絕對擔心; 但他們仍然支持我, 沒有奚落我, 放棄我. 還有朋友的心, 他們沒有給我白眼, 亦沒有因忙著大學開學而忘了我.
總之, 今次是跌得很痛, 但亦痛得很有意義.

本來預計能上大學後的計劃和期望, 現在只能再押後一年了.
這一年間, 相信網站真的不會再更新了. 當然, 我仍會到留言版看看, 仍會間中告訴大家我的近況. 總之, 前路真的不輕鬆了.

過左幾日, 個心平靜番D. 亦都知道應該要點做.
前路好難行, 而家先真正感受到原來我係一個意志咁薄弱既人.
一直以黎都覺得自己唔係咁需要其他人既支持, 以為咁就等於自己個性獨立; 其實只係以往既路一直都太平坦, 一直都太順境…
真正遇到人生既第一個大挫折既時候, 先知道自己係咁需要有人支持. 有時明知自己既選擇係正確, 但一諗到要自己一個行果陣, 又總會有D猶豫.

其實耐唔耐都會憧憬下一個人生活. 我同屋企人關係好好, 但就間中會幻想下一個人過自由既生活. 原來又係因為生活過得太舒適順意.
而家? 我總好希望屋企會有人. 我唔係要每分每秒都搵人傾計, 只要有個人晌屋企就夠, 有D人氣對我好重要.
見到屋企人為自己犧牲咁多, 一方面覺得好開心好感動, 一方面就覺得好內疚.

仲有朋友既支持都一樣重要. 以前, 我會覺得唔需要朋友既支持, 有D咩自己一個撐就OK; 始終都係因為無真正經歷過挫敗.
一向以黎, 我可以好單純咁去關心其他人, 我以為咁係因為自己份人NICE; 其實, 只係因為自己太無憂無慮, 有太多多餘既心機. 而家, 見到朋友有煩惱, 我都或者只可以簡簡單單咁畀少少ADVICE同少少祝福. 因為自身都難保.

在此, 多謝屋企人同朋友既真正支持.
原來我真係咁需要有人晌自己身邊, 尤其是係真切既精神支持.
有D眼訓喇…講住咁多先!