第二次A-Level放榜,今朝晨早彈起身上網check成績(自修生有得早D睇),8am前嗰十幾分鐘真係極度難捱。考評局時間好準,真係要僅僅8am正先入到。一睇,唉...真係好灰。除咗中文仍然得E,其他科straight D。
講真,上年入唔到U係因為我三科AL得DEE(我又唔想讀副學士)。我有同學DDE都入咗,所以其實今年入U機會唔細。
但係,呢半年話唔辛苦就假。冇錯,我做唔到一日溫十幾個鐘書,我做唔到起身讀書讀到瞓覺;但講到尾,我都係想拎返一兩條C啫。如果唔係我重考中英有乜意思?!唯一嘅好處係唔使combine cert囉。
坦白講,呢幾日嚟忐忑交戰,每分每秒都覺得呼吸沉重。一方面我坐D望C,另一方面我仍然怕任何一科AL會低過D。而家全AL拎D,睇落係OK咗好多;但實際上,我只得兩科進步,仲只係由E升為D。
我上年完全唔讀書,考試嗰陣仲玩緊;同今年認真咗大部份時間,只係聖誕新年假期唞咗陣,但出到嚟都只係三科中嘅兩科升咗一個grade咁大把,坦白講而家好灰。
雖則話今年入U機會大咗,但仍然唔係100%肯定。而家嘅心情只係未至於絕望,半點開心都冇。
一來我對自己失望,我自問唔係蠢人,唔係一課書睇極都唔明嗰種人。係我做得唔夠其他香港學生好?定係我對考試冇符?定係我根本唔適合讀書?上年冇讀過書都全科合格,我心裡面仍然淡定;但咁認真去讀都仲係冇乜起色,都唔知可以講乜好。
而家唯一希望嘅係,死都要死到入degree,然後喺新環境重新開始努力過啦。