好灰20040709
今朝晨早彈起身上網check成績.(自修生有得早D睇)
八點前果十幾分鐘真係極度難捱.
考評局時間好準確,真係要僅僅八點正先入到.
一睇…唉…真係好灰
除左中文仍然得E,其他科straight D.
講真,上年入唔到U係因為我三科AL得DEE(我又唔想讀副學士),我有同學DDE都入左,所以其實今年入U機會唔細.
但係,呢半年話唔辛苦就假.
無錯,我做唔到一日溫十幾個鐘書,我做唔到起身讀書讀到訓覺;但講到尾我都係想拎番一兩條C唶.如果唔係我重考中英有乜意思丫?!
唯一既好處係唔使combine cert囉.
坦白講,呢幾日黎天人交戰,每分每秒都覺得呼吸沉重.
一方面我坐D望C,另一方面我仍然怕任何一科AL會低過D.
而家全AL拎D,睇落係OK左好多,實際上我只得兩科有進步,仲只係由E升為D.
我上年完全唔讀書,考試果陣仲玩緊,同今年認真左大部份時間,只係聖誕新年假期抖左陣,出到黎都只係三科中既兩科升左一個grade咁大把,坦白講而家好灰.
雖則話今年入U機會大左,但仍然唔係100%肯定.而家既心情只係未至於絕望,半點開心都無.
一來我對自己失望,我自問唔係蠢人,唔係一課書睇極都唔明果種人.係我做得唔夠其他香港學生好?定係我對考試無符?定係我根本唔適合讀書?
無讀過書仍然全科合格,我心裡面仍然淡定;但咁認真去讀都仍然無乜起色,都唔知可以講乜好.
而家唯一希望既係死都要死到入degree,然後係新環境重新開始努力過啦.
