中秋節雜談

中秋晚
(網絡圖片)

今個中秋仍然悶熱。唔知係咪實行咗屋村扣分制,望出街都唔見到處火光喇。我都幾年冇落街燒蠟燭(都成廿歲人囉!),中秋節嘅氣氛一年年下降。

不過,相信呢個並唔單止係我個人嘅轉變。感覺上,好多小朋友都對落街點蠟燭冇咁熱衷,可能大家都搵到一D更好玩嘅嘢去過中秋喇卦。不過都啱嘅。唔同年代,生活方式係有轉變。

以前,未到中秋節,大家都已經人人一個塑膠燈籠(仲記得當時我有個幪面超人燈籠,同我差唔多高),而且仲會買定十盒左右嘅蠟燭。我仲記得嗰時返下晝班,所以就算第日要返學,當晚都可以玩到1am先走。

講到煲蠟,咁我當然冇煲過啦。唔係扮乖,因為煲蠟都唔係乜壞事,只係一向份人保守,玩嘢細細地就夠,從來唔敢玩大鑊嘢。(如果煲蠟煲得大,真係大鑊㗎。燒親自己燒親人都唔好啦!好傷㗎。)

不過以前中秋,我就興玩殘忍嘢--燒蝸牛。通常D人會中意燒蟻,但我覺得太殘忍,一隻蟻好地地又細隻。但可能因為我好驚同好憎蝸牛,所以嗰時燒得幾過癮。

除此之外就燒吓紙盒,燒吓西柚皮(哈哈,不過西柚皮其實係燒唔著嘅)。

再講吓月餅,相信大家都中意食月餅,近來仲有好多新口味,但我就真係從來都唔食月餅。其實冇話乜怕肥、唔健康嘅,只係我一向都唔中意食中式肥膩糕點(所以乜嘢年糕、蘿蔔糕我通通唔食㗎,甚至連糉都唔食… 哈哈)。所以D人成日同我講乜冰皮呀、白蓮蓉呀。我通通都唔係好明口感、味道有乜分別…

今個中秋節,我只係喺屋企過,但係就好輕鬆。呢兩日我將所有重讀嘅壓力拋開,呢一年要面對嘅考試壓力都唔理住。或者我係逃避啩,趁住節日氣氛而逃避生活。

不過算啦。半年時間係短,但唔易過㗎。要跑長跑,都唔可以一直開衡turbo嘅。

Oscar

香港人,八十後。中五會考後學人寫網頁、寫文字,記下生活大小事。

更多相關文章 »