Days of Immaturity

聽日七月四日，AL放榜。而家個心總有D涼，係驚到涼果隻。
曾經聽人講過，恐懼感就好似麻疹一樣，中過一次就有免疫力。（唔使估，係幽遊白書，幽助對戶愚呂弟果一場。）
到底真唔真？

記得兩年前八月一號，會考放榜前既一個星期，我已經驚到暈。仍然記得自己點形容－－無特登去諗，但係總係神不守舍；成日聽錯人講野，睇書都成日睇錯，仲晚晚訓唔著。
今年？前兩日先去完大嶼山兩日一夜番黎，感覺仲係淡然。雖然間唔中都會忽然「心涼」（驚到涼），但就無兩年前果種天昏地暗既感覺…
可能因為真正值得驚既係八月六號，睇下入唔入到大學果陣；又可能因為我已經做好心理準備，準備要一邊搵工，一邊讀多一年出年再考多一次。唔知呀…聽日會點，今日點知。不過，十之八九要重讀重考，呢個係母庸置疑。
其實都有諗過大概要點做。聽日拎完成績，係時候搵番D書出黎準備再由頭讀多次，係時候去搵幫人補習或者搵工；然後就做自修生。
其實好應該心足。考完試呢兩個月，玩晒；乜都無做過，只係玩，日玩夜玩。好應該係時候要搵工，要再認真咁讀多次－－中六中七呢兩年過得好開心，但係就荒廢左讀書時間，就算要重讀一年都係抵自己死既。

可能因為已經諗好點行，所以無咁驚啦。不過，聽日會點始終未知。只係希望可以控制得住情緒，唔好失控。仲要積極咁打算之後應該點行。沉重又如何，只可以硬住頭皮向前行。
咁到底恐懼感有無免疫？哈哈，唔知呀。總之呢兩日先開始驚，感覺無兩年前咁難頂啦！